Friday, June 15, 2012

JUNE  2012                                                                No.6  Vol. 4
                                                                           Editorial
                 
                             2012 kum chanve kan thleng leh ta der mai. MCFS kum 15-na Birthday kan lawm zo a. Kan chanchinbu  paw’n kum li  hmel a lo hmu ta der   mai!
 Hnam changkang apiangin ziak leh chhiar an uar a. Mizo te pawh hian zirna lamah leh ziak leh chhiar lamah hma kan sawn nasa hle a.  Tun aia hma kan sawn theih nan thangtharte hian theih tawp kan chhuah a ngai a. Kan thu leh hla te hi thangthar ten theih tawp chhuaha kan humhalh loh chuan kum rei lohah a bo mai dawn a ni. Hnam fing apiangin mahni tawng humhalh nachang an hria a. Mizo te pawh hi kan tawng leh zonun mawi hi kan humhalh a, kan chawm nung zel a pawimawh a nia.
                Khawvel mipui tam takin-a kan thlir reng thin Euro Cup pawh a hun takah a lo in hre chhuak leh ta. Champion no mawi eng ram takin dawng ang maw? Kumin chu lawmman la ngai lo lawmman lak kum a ni a, England pawh hi rin loh deuhin an champion mai thei a ni…
                Chawlhni vawi thumna hi Father’s Day a ni a. Chhungkuaa pa pawimawh zia Father’s Day denchhanin kan lo thai langa in lo chhiar dawn nia.         



Chhungkuaa Pa Pawimawhna
Chhungkuaa pa dinhmun hi a pawimawh hle a, pa nei tawh lo chhungkuate hian an hre chiang zual awm e. A bik takin Mizo chhungkuaah phei hi chu, “ Pa thu neihna chhungkua,” ti ila kan ti sual awm love. Bible-a kan hmuh dan in, “ Hmeichhe lu chu mipa a ni a, mipa lu chu Krista a ni a, Krista lu chu Pathian a ni,” ( 1 kor. 11:3) tih kan hmu a. He hian chhungkuaa Pa pawhmawh zia a ti lang chiang em em mai a ni.
            Hmeichhe lu chu mipa a nih angin chhungkua nu berin pa thuneihna a zah thiam hi a pawimawh khawp mai. Nu in pa thuneihna a zah thiam chuan fate paw’n an zawm mai thin a ni. Mipa lu chu Krista a nih angin Pa paw’n Krista rawn chung zelin chhungkua a enkawl a pawimawi khawp mai. Chhungkua pa ber nih vanga mahni thu thu a, thil tih hi a fuh ber lo thin. Pa thuneihna chu Pathian duh zawng nen a inmilh zel loh chuan Pa chuan a dinhmun a luah zo lo a ni ang.
 Nuin chhungkua a uap lum a, pain chhungkua a uap zahawm thin.  Pa chuan chhungkua hi hmangaihna nen a enkawl thin tur a ni. Chhungkua nunphung pangngaiah chuan faten pa aiin nu an bel bul zawk a. Harsatna leh manganna tak tak chhungkuaah thleng se, nuin, “ Hlau suh u,” a tih ai chuan pain a tih chu faten an thlamuang pui zawk a ni.
Nupui fanau te beidawng mah se pain, “ Lungngai ma ta chu u,” a tih tlat chuan chhungkua hi a thlanmuang thin a ni.
            Juda lal Hezekia pawh kha lal ropui tak ni mah se a chhungkua awm dan tur a rel fel loh avangin a dam chhung kum 15 tihseisak a ni a. Pa hian chhungkuaah mawhphurna a nei lian hle a, chhungkua awm dan tur engkim hi a rel fel thin tur a ni. Doudlas Mac Authur-a chuan, “ Sipai ka ni a, sipai huaisente lawmman vawi tam tak ka dawng tawh thin a, Chung lawmmante hlawh chhuak tura harsa ka tih aiin ka chhungkaw rel fel hna hi a harsa ka ti zawk,” a ti a. Napolean-a pawh hi hming thang hle mah se a nupui Josephine-I a thunun zo lo va, ram rorel aiin chhungkaw rorel hi a huphur zawk deih a ni an ti. Kohhran hotu ni tur phei chuan, “ Zahawm taka fate kilkawia mahni inchhung khawsak rel fel thiam mi an ni tur a ni,” tih ( 1 Tim. 3:4) ah kan hmu a.
            Pate khawlohna avanga fate, fate fa leh te, chhuan thumna leh chhuan lina thlenga hrem thin pathian a nih zia kan hmu a. He hian chhungkuaa pa pawimawh zia a tih lang chiang em em mai a ni.
(Note: Chhungkuaa pa pawhmawhna hi MCFS zirlaibu Kristian Chhungkua lehkha bu atanga kaihtawi a ni a, Father’s Day den chhana kan lo thai lang mai mai a ni. Ed)                                                                            
                                                                           
                                                                EURO 2012

             European Championship hi 1960 tan a ni a. Kum 50 chhungin tum 13 an buaisaih tawh a ni. Kumin Euro Cup hi a tum 14-na a ni.                                     
Germany hian tum thum no mawi an chawi tawh a, pahnihna pawh tun thum an la tawh bawk a ni. Kumin pawh hian rin kai ber team an ni ti ila a sual  lo ang. Spain leh France te hian tum hnih ve ve Champion no mawi an chawi tawh bawk a.  Holland, Italy, Denmark, Greece, Czech Slovakia leh United of Soviet Socialist Republics (tun lai a Russia tia an koh tak) te hian tum khat theuh champion no mawi an chawi tawh bawk.                                   
EURO 2012 chu kan hma lawk, June ni 8-ah ṭan a ni leh dawn ta a, Poland leh Ukraine-in an inthlenṭâwm dawn a ni. He tournament-ah hian team 16 telin group 4-ah an inṭhen a, July ni 1-ah Ukraine khawpui, Kiev-a Olympic Stadium-ah final khel thei tura ruahman a ni. He tournament-ah hian inkhelh 31 a awm a. Ukraine-ah tum 16 an khelh ang a. Poland-ah  tum 15 an khelh ang.  Khelmual 8-ah an inkhel kual dawn a ni.
                                                             MCFS News Letter Hi
                                   By. Biaka
Kum 2008 MCFS General Meeting chuan MCFS member te kan inhriat pawh tawn nan leh  khaw lam chanchin kan hriat tlan theih nan MCFS News Letter chhuah turin thu a passed a. Editor atan Pu Lalrengpuia (The Rengs) thlangin,  Board Member tur mi pathum a thlang tel bawk a ni.
                June thla hi MCFS News-in a kum li-na hmel a hmuhna a lo ni ta reng mai.  A chhuah hlim han dawn kir chang chuan lung a leng em em mai a ni. A chhuah hmasat ber tum khan Editor kha ama hna lamah a buai deuh avangin Maliana (facebook Thangsira pa ) hian a buaipui a, football chanchin a ziak khat deuh vek mai a ni. Editor-in phur lo zetin a edit hnuah a vawi khatna atan tihchhuah a lo ni ta a ni. Computer kan neih loh avangin a hlui lei tur emaw tal zawng turin Editor-in a rawt hial thin a, chutih lai tak chuan vanneihthlak takin Nl. Sang Sangi ten an Computer hlui MCFS tan an han present chu The Rengs meuh pawn Halleluiah vawi thum a pe  lo chauh chauh!
Kan computer neih thar chu Amakeng  run nuam Editor khum chungah ngei  dah a ni a, editor khum chu MCFS News Office a ni ngal bawk.  News tur  chhut mawlh mawlh laia mei (current) a thi thin kha chu ...... i save hman em? tih zawhnain a zui tlangpui a,  ‘save hman nang’ tih tawngkamin mathei lovin  a hnu khar a ni ziah bawk,  a hautak thei

khawp mai. 
Member-te hnen atangin hetiang hian article kan dawng tlangpui a: - a thenin lehkhain an rawn theh lut a, chumi chu kutzungchal ngar ngarin  computer-a han chhut luh kha a rang mawhin hun a duh rei thei khawp mai. A thenin editor phone atangin an rawn thawn a, editor phone hmai kha rawng kai nuai a nih avangin a type chhawn leh chu sawi loh chhiarchhuah tur ringawt pawh hna pakhat a tlin avangin phek khat chhu chhuak tur phei chuan dar kar khat dawnte hun pek zu ngai thin a mawle! A then erawh chuan MCFS mail-ah an rawn thawn fel et a, chu chu la chhuakin computer-ah awlsam tein thun chhawn leh  a ni thin. 
Thla tawp lam hi chuan hna atanga haw hmasa apiangin News lam buaipui turin computer hi kan han on ngei ang a, a chhan chu kan computer kha on atanga dar kar khat hnuah chauh a hman theih thin vang a ni. Zan khatah current vawi hnih vel a thih phei chuan computer on leh nghah chhungin hun kan hman ral a ni ber mai. Editor -The Rengs-a kha thu leh hla lama mi tui lutuk a nih avang khan a hnaa a hah deuh tum pawhin news chhuah a hun chuan zing lam dar 2 te a thleng zak zak thin a ni. 
A edit zawh hnuah engkim a peih fel ta maw tihah, “ kan hna ka zo in print thei,” a ti a. Pu Hruaia’n an office-a a print hman loh chuan Boolay Place lamah print tir a ni thin a. Microsoft Words chauh kha hman thiam a nih avangin print theih maia computer-a rem fel sa pawh kha 
amahin a lo dang lam thin a, print-na dawrah buaipui leh hrep a tul chang pawh a tam.  The Rengs-a hian  kum hnih chhung MEFS News a enkawl hnuin Tahan lama a nupui fanau te bula awm turin min hawsan ta a ni.
                Kan Editor ber a haw hnuah chuan ‘MCFS News hi tunge enkawl chhunzawm ta ang’  tih kha member-te zawhna lian tak a lo ni ta a ni. Mahse, Editor hmasa ang tho a MCFS tana inpe zo em em, MCFS Val Upa Chhana (Facebook-Tlangzawl Pa) chu MCFS Meeting chuan News enkawl chhunzawm turin a thlang leh ta a. Ani hi chuan  computer a neih mai bakah printer pawh a nei ngal a. Board member te buai ngai lovin amahin a lo zo fel leh duak zel a ni. Chanchin thar lam hi  a duh tui thei em em a, a changa news han thawn te hian a update lo te mi lo tihsak thin a. Ani pawh MCFS News tan hian vawi tam tak a tleivar thin a ni. Thil engkim hi a duh tuia tun thleng hian nupui a la hmuh loh pha niin a lang! A contact duh chuan www. Tlangzawl Pa.com-ah in contact thei e…. KU Chhana hian MCFS News hi kum khat leh a chanve vel a enkawl hnuah USA lamah min liamsan ta a ni…..
                Kan Editor hmasa pahnih te hian inan-na tam tak an nei a. An inan-na lai ber nia ka hriat chu ‘slipper an ti bo ve  ve’ tih thuah hian a ni.. .. An tih bo dan leh tihbo chhan hre duh chuan Tv. Mawia’n leh MCFS President a zawh theih reng…. 

                                                                     MCFS NEWS


Mike Thar leh Sound Thar
                MCFS inkhawm-a kan hmang thin Mike leh Bass Sound box  hi Nl pakhat hming hriat loh in a present a, Pasal tha deuh a hmuh theih nan I tawngtaipui ang u. Hetianga phal taka mahni sum leh pai senga MCFS tan a present hi MCFS hmingin lawmthu kan sawi e.

Lawmthu
                MCFS Day-a refreshment  kha Tv. Em em Hriata tum a ni a, a chungah MCFS hmingin lawmthu kan sawi e. Nupui tha deuh a neih theih nan kan tawngtaipui thin bawk dawn nia. Tv. Mawia’n, “ Nupui a hmuh theih nan rinna thlai chi MCFS ah a tuh a nih hi,” a ti.


Thursday, May 24, 2012


February  2012                                                                No. 2 Vol. 4
                                                          Editorial
            Hruaitu ten kan thlakip chhuak chanchinbu enkawl leh turin min ruat a, a lawmawm rual rualin a huphur awm ang reng khawp mai. Kan chanchin bu hi nitin chhuak a ni lo a, duh angin chanchin thar a chhuak lo a nih pawhin in ngaihthiam kan ti ang chu….
            MCFS member ten kan hlawkpui theih tur news leh article theih tawp chhuahin kan zawng anga. Chanchinbu pakhat chhuah tur hian Editorial Board  kan tangrual a tul a. MCFS member te pawhin thu leh hla lamah theih tawp chhuaha min tawiawm a ngai. Chanchin thar, fiamthu leh article kan mamawh reng a, MCFS Email-ah englai pawhin a thawn theih reng a ni.
            Tun thla chu MCFS General Meeting minute kan lo thai lang a, MCFS committee in chanvo nei tura a ruat te hian mahni chanvo theuh hlen theih tum hram ang u! Committee a  rorel te hi kan bawhzui loh chuan rorelin awmzia a nei dawn lo a, member tin ten kan rorel bawhzuina kawngah lungrual takin tan I la ang u!
            Tanrual pawimawhzia leh tanrual chu chakna a nihzia sawi ngai lovin kan hre theuh awm e. Kumin chhung hian MCFS member te rilru, taksa leh thlarau lama tan kan lak thara rawngbawlna lamah pawh lungrual taka ke kan pe ho a ngai a ni.
            Inpumkhatna leh tanrualna hi a khaikhawmtu ber chu TANRUAL HI CHAKNA A NI……..

                                                                   MIKHUAL
                                                                                                                       By: V.L Awia(Malaysia)
 Nuam kan tih ve thin vei vei nen!
Kan khua atang ngawt kha chuan khawvel hawiher, leilung pheichheh, tunlai thil kalhmangte hi thlir thiam rual ni hek lo! Chhungte ngai ngawih ngawihin, tu-te emaw (tu-te emaw la ni chiah lo, ni deuh ang rengte) hnung chhawnin, lunglen runthlak tuar huamin khawvel chhim leh hmar chhak leh thlangah kan peng darh nuaih a.
Kan pi-te veng ni miah lo, ka pu-te khua pawh ni lo, mi hran sa hran, ‘Kan inah lo thleng ta che’ titu hmelhriat pawh an awm lohna hmuna mikhual nih zawng a hautak ru phian. Mahse, zin fanga zin satliah kan ni hauh lova, si-ar la turin, mahni tuifinriat theuh hleuh kai tumin kan hman hlel a nih ngai hi.
Mawlna pui roh hian hriat lohna hruihrual fei tawk hmangin a thuah thipin min vet chiam a, hriat aiin hriat loh, thiam aiin thiam loh kan ngah zawk a.
Keimahni hian kan zir lo ve reng nge? Kan zirlai khan a zir lo hrim hrim? Chu pawh chu ka hre lo bawk. Ka hriat loh tamzia hi hriat sen rual a ni lovang. Ka bo dan hi a ril ngawih ngawih. Ka hriat loh ang hre ve lote len huai huaina kan khua ka ngai zual thin!
Kan khuaah kha chuan thal ni sa, fur ruahtui, thlasik khaw vawt vin tuk laka min humtu ‘kan in’ kan tih ve thin kha pian mawi lutuk lo hian a ding ve tau a. Kaihza kham vengtu tur hero cycle chul tawh lam leh China bike (Jialing) second hand hawl pha chin chu chhungkaw ziaawm tak an nih hmel. Hetah chuanin… income-in a zir mawlh lo. Thian pali-nga inthurualin in inluah tawmin kan khawsa nawk nawk a. Tuk zan a lo tam a, thu inhmu a inngeih dial dial reng a harsa a, inngeih loh lah, a hrehawm zual. Dawhtheihna rubber a fan tawp thleng raka pawh fan fan fan a tul thin. Kan ti ti lah chu, kan boss te car nalh theih zia, kan pite sum lut chhuak turu dan tur tih vel kan insawi siak mai mai. An fate chhiat loh thu nen! Hna a tluang reng thei si lo, a karah lung a lo leng chhen bawk. Kan khua ka ngai zual thin!
Kan incheina atangin a ram mi kan nih lohzia an hre thei pek a, inchei loh lahin a hriat zual sauh. Sunday thawmhnaw uluk tawka ka rawn paipawn ve pawh khan min chhan lutuk hmel loh. Min thlir dan atang rengin min ngaihsan kan phut ngam ngang lova, min ngaihnep lutuk loh erawh a rukin kan beisei che che. Tawnzau, kekawrbul leh sport form inbela kan tei nelh nelhna kan khua ka ngai zual thin!
Hnathawhnaah boss-te’n tumah rawn buai lovin an duh hun hunah min ban thei a, an zing tho fuh loh vang chauhva min ban pawh ni ila kan sawi ve phak a awm thlawt lo. Dinhmun a derthawng thin teh asin. Kan nihphung hrechiang mang lova, beiseina sang tak nena min thlir dauh dauh thintu khaw lama chhungte an zahawm ka ti thin.
Duh huna thawh a, duh huna chawlha indawl chuh vut vutna kan khua ka ngai zual thin!
Dawrpui lama len chhuah chang hian a hrehawm zual. Mamawh kan nei, thawmhnaw, bungrua leh a leina tur  Bawihi duhzawng a tlep tuar a, thenkhatte awh-zawng an hung thliah thluah, Mami leh Mama te lawm tur ….. hmuh hmaih a har, a leina kan neih hmaih chauh zawk a ni. Hetiang ni khuaah hi chuan pawisa chhiar sen loh leh hman chawp tur tlem neih a chakawm thin. Itna leh awhna a nepna kan khua ka ngai zual thin!
Chhingkhual chan chhung, hmasawnna tur nia hriat um-a kan zin kawngah hian hrehawm, hlauhawm, harsatnate’n min cho ther ther reng a. Rilru sawizawiin, ngaihdan hrisel, thinlung rualawt pu chung zelin chhel takin aw…..
Nia, kan khua a ni lo, mikhual kan nia!
( V.LAwia hi T.Melody Band-a hla phuahtu leh Bass guitar tumtu kha a ni a. Tunah Malaysia-ah hna thawkin a awm mek…Ed
                                               
                                                                  MCFS NEWS 

 CHIN NATIONAL DAY
             19th, February, 2012 ah Chin National Day tum (64)na  ropui taka buatsaih tum a ni. A hmun hi Dover MRT bul Singapore Polytechnic Convention Center  a ni ang. Chhun dar 1:00pm to 6:00 pm  tur a ni. Mi pakhat-ah en man S$-20 a ni ang. Ticket lei duh chuan Pu Joshua leh Tv. Thangpia contact mai tur a ni.
            Myanmar atangin zai thiam tak tak sawm an ni a. Mizo zai thiam Tv. Lalnunsanga( T.Melody Singer ) pawh MCFS sawmna ngai pawimawhin Chin National Day hmang turin a lo kal dawn. Tv. Lalnunsanga hi ni 17 chhunah Singapore a lo thleng dawn a, a hmuak thei tur chuan Secretary contact tur a ni ang.   
  Chin hnam hrang hrang ten  lam chi hrang hrang kan zir a. MCFS pawhin Cheraw kan inrin zan leh chawlhni zanah Pu Joshua te thenawm ah zirna neih thin a ni.   Chin National Day (Feb 19) hian Biakin khar a ni dawn a. Day hmanna lamah kal kan tum theuh dawn a nia.
            Chin National Day concert a  sum hmuh te hi Chin Hill-a rethei tanpuina tur a ni dawn a, kan en thei dawn lo a nih pawhin Ticket pakhat chu lei I tum hram ang u!!!!!!

MCFS Inkhawm Hriat Tur Pawimawh
MCFS Inkhawm chanvo hi in ruat thiam a har khawp a. A then chawlhni tin  an inkhawm theih lai’n a then thla khat vawi khat chauh Inkhawm  thei an awm a. Secretary ten chanvo nei tura min ruatin kan hman dawn lo a nih chuan hruaitute  hrilh hriat leh tur a ni ang.  Secretary ten chavo min ruat khat deuh a nih pawhin vui mai lovin kan chanvo neih duh ni secretary  te hrilh mai tur a ni..
 MCFS inkhawm a chanvo I nei a nih chuan hun ngai pawimawh hram ang che. A then chu thlakhat vawi khat chauh chhuak te an ni a. Thil tih tur dang te pawh an nei thei. Then khat tlai dar 5 in thleng ngai te an awm thin bawk. Thian te hriathiam tak chung a hun kan hman a pawimawh.

Bass Guiter Thar
  MCFS General Meeting chuan Music lama hma kan sawn theih nan tiin  Bass Guiter thar lei a rawt a. Feb ni 3 tlai khan kan hruaituten  S$-580 an lei……..




Sunday, May 20, 2012

2012 MCFS Hruaitute

President                : Pu F.V.L Hruaia ( Tahan)
Vice President        : Pu Laldinpuia ( Valbuanga) ( Tahan)
Secretary                : Pu Joshua ( Yangon )
Asst Secretary        : Nl. Rosangzuali ( Yangon)
Treasurer                : Nung Lian Thang ( Thangpia ) ( Tahan )
Mission& Building Treasurer : Nl. Lalramdinpui ( Tahan )
Auditor                   : Tv. Lalhriattira ( Tahan )
                               : Nl. Lalchhandami ( Aizawl )
Committee Member: Tv. Lalzothanga ( Yangon ), Tv. Lalhlunmawia ( Tahan ), Tv. Zothlamuana ( Tahan ), Tv. Biakhmingthanga ( Tahan ), Tv. Zaihlimpui ( Satawm ), Tv. Lalrawngbawla ( Sanmyo ), Pu. Lalzuisanga ( Satawm ), Pu Ramthangliana ( Singapore ), Tv. Joseph C. Lalhluzuala ( Aizawl ), Tv. Jimmy Lalruattluanga ( Lunglei ), Nl. Rebecca Lalnunpuii ( Tahan ), Nl. Hmangaihsangi ( Aizawl ), Nl. Lalrinkimi ( Aizawl )


                                

Friday, May 18, 2012

MAY  2012                                                                No.5  Vol. 4
                                                          Editorial
             MCFS-in  a kum 15-na Birthday a lawm ta der mai. A kum 10 Birthday Marina Bay-a kan lawm tum khan MCFS members chu tlem te tak tak kan la ni a,  MCFS inkhawm pawh thla khatah vawi 2 chauh kan nei thei a ni. Kum 15 a tlin  meuh chuan member mi 250 vel kan ni thei a. MCFS Day-ah pawh mi 100 chuang kan inkhawm thei ta hi a ropui hle a ni.
            Khawvel mihring te hi kum 15 atanga 25 thleng hian mahni inrin tawkna kan neih len hun lai tak a ni a. He mahni inrin tawkna hian kawng dikah leh dik lohah min hruai thin a ni. Thenrual kan ngainain thiante nena thil kan tih apiang hi nuam kan ti a, hma lam hun tur thlir mang lovin kan kal mawp mawp thin a ni. Kan duh anga thil a nih loh changin beidawngna khurah min hruai lut thin.
            MCFS hian a din tan ni atanga vawiin ni thleng  Pathian malsawmna leh awmpuina  kan dawng nasa em em a, a lawmawm hle a ni. Kumin Chin National Day-a Cheraw kan kan te leh CCFS Football Tournament-ah champion no mawi kan dawm theite hian kan inlungrual zia leh kan tangrual zia a tilang em em mai a ni.
            He kan inlungrualna leh phurna hi kawng dika min hruaitu ni zelin, hun lo kal zel turah Lalpa chakna rinchhan chungin ke i pen zel ang u.
            MCFS  par ang vul zelin  rethei chanhai te tan malsawmna lo ni mawlh rawh se……
                                                               
                                                               ARTICLE
                                                 Ka Thil Tawn Ve Chu
              By Zothlamuana
Inrinni tlai a ni a, hna atanga ka haw hnuin ka hahdam ta maw tihah bual in lam ka pan a. Ka inbual zo ka phone ka han bih chuan ka number hriat ngai loh hian tum hnih ngawt min lo call niin. Ka call let nghal a. Aw ngaihno bei tak hian a rawn chhang a. Ka hriat ngai loh lanu a nih avangin dil chhut takin a hming leh khua te, Singapore-a a awm tawh chen te leh eng vanga min call teh tlat nge a nih te ka zawt nghal a. 
A hming  te, Singapore-ah kum khat a awm tawh thu te, off-day a la neih loh thu te leh MCFS-a inkhawm a chak thute min hrilh a. A chhungte pawisa thawn a duh thu  min hrilh hnu chuan, ‘Khawngaihin min pui thei a ngem?’ a ti a. ‘Mizo kan ni a, harsatna apiangah kan inpui tur alawm’ tiin  aw-ka zang takin ka chhang a.
Naktuk hi off-day min pe hlauh va,  ka la chhuah ngai loh avangin ka kal thiam si lo, min rawn hruai theih chuan ka lawm ngawt ang a ti a. Naktuk hnaa ka kal a ngaih avangin thiante ka lo hrilh ang a, rawn hruai tur che chu an awm mai ang ka ti a. ‘Tumah hmel hriat dang ka nei lo, ka hriat awm chhun i ni, nangmah ngeiin min rawn hruai theih chuan ka lawm viau ang. Off-day nei tur hian Pathian hnenah ka dil thin a, Pathianin ka dilna te min tih hlawhtlinsak a. 
Chuvangin naktuk chu hma deuh hlekah chhuah ka duh dawn a a rawn ti leh a. Chuti chu kan Boss-te ka phone anga chawlh min pek theih chuan  keimah ngeiin ka rawn hruai dawn che a nia tiin chanchin inhrilh leh turin kan intiam ta a. Hna chawlh ka duh thu kan Boss ka hrilh chu Pathian zarah a lo phal hlauh mai a. SMS-in  ka chawlh theih tur thu chu ka va hriattir a, ani chuan Pathian remruat tak tak a ni kan inhmu thei tur chu a lawmawm hle mai a ti a. A tuk zing dar 9:00-ah an awmna MRT-a inhmu turin kan inmangtha ta a.
Sunday zing a ni a, nula hruai tur chuan  ka theih tawka rangin ka inbuatsaih sawk sawk a. Tichuan kan han inhmu ta. City hall lam ka kalpui nghal a. Mi dang call tur leh biak tur a lo ngah phian a. City hall kan thleng chu a thiante nen an han inhmu a,  ring tak taka  tawngin an han in au va, an  nui tuar tuar bawk a, min hre chang lem tawh lo ni hian ka hria a. Kal duhna a ngah, kal hmasakna tur lah hre chuang lo. Chutia kan phi kual vel chhung chuan chawhnu dar 1:00 a lo ri der mai.
Biak in lam pan tawh ila tiin ka han rawn kual a. Tlai lam dar 6:00-ah in thleng leh tur ka ni a, chhuah ve theih chhunah Sakei ka atanga tui lo chhuak pawh hmuh ve ka duh a, bakah thlalakte pawh ka duh hrim hrim, i hmaizahawm viau nan min rawn zui zawk mai la, tiin rin loh takin chhanna ka dawng ta daih mai Ngaih dan ni vak lo chung leh thinrim teuh chungin a nih ka kalsan mai ang che u tih leh kal chhuah ka rual a.  Ani  chuan leh pekah aw a la ti talh a.
Biak in lam ka pannaah chuan hetiang hian ka ngaihtuah a, thla tin pawh chhuak se thla khat vawi 1 chauh a nia a ti  ang a. Chawlh kar tin pawh chhuak thei mah se kar khat vawi 1 chauh a ti tho ang ti tein ka phun sep sep a. A tawpah phei chuan ni tin pawh chhuak se ni khat vawi 1 chauh a nia a la ti talh tho angte ka ti ringawt a. A Ram leh A Felna hi kan zawn hmasat thin loh avang hian a ni kan tawngtai chhanna pawh kan hmuh thin loh tih te min ngaihtuah tir ta zel a.

                                                                     NU
            Khawvela hming lam nuam leh lam ngun ber hi nu te an ni ngei ang. Nu te pawimawih zia hi sawi zawh seng a ni lo a. Napoleona’n, “ France ramin a tlakchham ber chu nute an ni,” a tih lai khan an ramah chuan nu ringawt chu an tam ngei ang. Amaherawhchu, mahni chhungkua uap lumtu nu an tlem vang a ni nge ang.
            George Heberta’n, “ Nu tha tak pakhat chu zirtirtu za khat tluk a ni,” a ti a.  Abraham Lincoln-a pawhin, “ Ka bat hi tlak dawn ila, ka nu laka ka bat hi ka tlak huphurh ber a ni,” a ti a.
            Nu duhawm te lakah hian khawvelin a bat a tlak seng lo a ni. Aw…. Nu te hi an va hlu tak em!                  

                                          

                                                         CCFS Football Tournament
Kan ngahhlel em em  CCFS Football Tournament ropui tak chu hlim taka hun hman zo a ni ta. 
Match khatnaah LCF( Lai Christian Fellowship) leh MCF( Mara Christian Fellowship) te an inkhel a. 3-1  in LCF an chak.
Match Hnihnaah FCF( Falam Christian Fellowship) leh ZIS( Zomi Inkaung) an inkhel a,  7-2  in ZiS an chak.
Match Thumnaah MCF( Mizo Christian Fellowship) leh LCF( Lai Christian Fellowship) an inkhel a, MCF 2-1 in an chak.
MCF tan  Thangliana  leh B.N-a ten  goal an thun a ni. Kum 4 chhunga MCF in LCF tum khat kan hnehna a ni.
            Match linaah MCF( Mizo Christian Fellowship) leh MCF( Mara Christian Fellowship) te an inkhel a, 1-1 in an in draw. MCF tana goal thun tu Aruata a ni.
Match nganaah Pathumna an in chuh a, LCF leh FCF te an inkhel. 6-3 in LCF an chak.
Match ruknah Final inkhel ropuiah MCF leh ZIS te an inkhel a, MCF 2-1 in an chak. MCFS tan Aruata leh leh B.N-a ten goal an thun. Kum 4 chhunga MCF in ZIS tum khat a hnehna a ni. MCF an CHAMPION ta a ni.
                                            
                                                          Lawmthu…..
            Kumin chu MCFS ten pathian malsawmna kan dawng  a,  kan thil tih engkimah  hlawhtlingna min petu kan pathian hming chu fakin awm rawh se.
               February thla atang khan player tha hnem ngai tak tak ten training an rawt a. Kum hmasa kan chak lohna khan MCF player te rilru a hneh em em a, theih tawp chhuahin kan training anga lawmman lak ngei kan tum tur a ni tih hi an rilruah an dah lian hle. Inrin tlai leh chawlh ni tlai a sur a sa hnuaiah theih tawp chhuahin an training thin a ni. Hetianga player taima tak tak kan nei hi MCF te kan van neih hle a ni. Player thenkhat training-na regular  taka lo kal si a pet ni a first-11 tel ta lo te kan awm bawk a, in ngaihdam kan dil bawk a ni. A pet ni a field chhunga theih tawp chhuaha in tan lakna leh inlungrual  taka inkhel kha MCF hmel in ti mawi a. Player te in tlawmngaihna leh  in peknaah MCF hmingin lawmthu kan sawi e.
            MCFS meeting chuan CCFS Football Tournament tel turin a rel a, inkhel mite uniform man tur leh ei leh in man atan S$-1300 a sanction a. MCFS hruaituten member te tuina hriat thiam puia theih tawp chhuaha tan an lakna hi a ropui hle a ni. MCFS hruaitute chungah player te kan lawm hle bawk..
            Training-na leh friendly match khelna apiangah MCFS member theih tawp chhuahin in lo en thin a. A pet ni a a sur a sa hnuaia MCFS members te au thawm khan player te tan phurna in siam a ni. Final-ah ngat phei chuan player te kha an hah em em a pawn lam au thawm khan chakna tam tak a siam a. A pet nia lo entu zawng zawng MCFS Members te chungah leh Fellowship dang thian te chungah kan lawm em em a ni. 
                          

Tuesday, September 6, 2011

September 2011 MCFS News

Chanchin Lawrkhawm


Libya


Hel ho chuan capital Tripoli leh Libya ram pumpui deuh thaw an hneh tawh a, kum 40 chuang rawng taka roreltu Colonel Gadafi chu a awmna chin hriat lohvin a biru mek a ni. Febuary thlaa intan roreltu sual paihthlak tuma ram chhung inbeihna avang hian mi sang tam tak an thi a, sing tam tak an hliam tawh a ni. NATO tangrual pawl (US, UK, France, etc) leh Arab ramten raldo thlawhna hmangin hel ho hi an tanpui a ni. - BBC/wikipedia


+++++


England


August 6-10 khan London leh England ram khawpui tam takah suahsual rawngbawlna namen lo a thleng a, tleirawl rual za tam tak chuan chhan leh vang mumal tak nei lovin kawng an zawh a, an hmuh apiang ti chhiain dawr tam tak rawkin an lak theih apiang an la a. Police leh heng mihawklakte inbeihna avang hian mi pa 5 in nunna an chan a, police 186 hliam an ni. Heng tleirawl rual thil tih chhiat zawng zawng hi pound maktaduai 200 hu anga chhut a ni. He thil thleng avang hian mi 3100 zet man a ni tawh a, 1100 chuang court-a thlen an ni tawh. - Agencies/wikipedia


+++++


Monaco


Argentina leh Barcelona player Lionel Messi chu Aug 26 khan UEFA Best Player in Europe lawmman hlan a ni.


+++++


Burma


Sorkar chuan income tax zaa sawm (10%) zel a lak thin kha thla 6 chhung ti hniamin zaa pahnih (2%) chuah lak a tum thu a puang. Hei hian August 19 atangin Febuary 19 thleng chauh a huam dawn tihna a ni. Entirnan Singaporea hnathawk thlakhata 1000 hlawh chuan Embassy-a thlakhat tan 100 a pek thin kha hemi hun chhung hian 20 chauh thun tura tih an ni ang.


Burma ram chhungah tunlai hian US Dollar rate a kai leh tan a, August thlaa dollar khatah 670 thlenga a tlak atangin 770 thleng a rawn kai chho leh a ni. Hei hi ram hruaitu thenkhatten sorkar official pawisa thleng rate dollar 1 a 900-1000 Kyat-a siam that an rawt thu thang vang nia rin a ni. Sorkar-in a rate rin tlak a siam tak tak ringin mi hausaten dollar an lei khawl nasa hle a, chu chuan demand ti sangin dollar rate a lo kai phah niin an sawi.


Kawlram chhunga chhungkaw tam tak hian an fate ram dang pawisa thawn an rinchhan avangin dollar rate tlahniam khan mi sang tamtak khawsak rel a ti buai a ni. – Agencies


+++++


Israel pan tur Mizo-Juda 7500


Kumin chhungin Mizo-Juda 7,500 aia tlem lo, an ramtiam Israel-ah an pem lut dawn a ni, August 26 chhuak The Times of India chanchinbuin a sawi a.


A tam ber chu Manipur atanga kal tur an ni a, Mizoram atang chuan mi 3000 vel an nih dawn thu Mizo-Juda pawl ‘Bnei Menashe’ hruaitu pakhat Jeremiah Hnamte chuan a sawi.


Aizawla hmunpui nei he Bnei Menashe pawl pawm dan chuan Mizo te hi Israel hnam bo 10 zinga pakhat niin kum 2700 kalta khan China paltlangin tuna Mizote chenna hmun hi lo thlang an ni.


Israel hnambote zawng kawnga hmala pawl ‘Shavei Israel’ chuan Bnei Menashe te chu an hnambo ngei an nih thu kum 2005 khan an rawn nem nghet a, chuta tang chuan a nawlpuiin Mizo-Juda-te ramtiam panin an pem thla nasa hle a ni.


Tunah mi 1700 aia tlem lo Mizoram leh Manipur state atanga kal Bnei Menashe member-te chu Israel ramah an inbengbel mek a ni.


Bnei Menashe te chu Israel ram an thlen hunah chauh dan ang takin Juda sakhua-a inlet tur an nih thu Jeremiah Hnamte chuan a sawi bawk a ni. TOI/Wikipedia


+++++


Sangha manna Bomb vanga thi


Sangha manna bomb, in chhunga tih puah palh avangin August 5 khan Kalay University campus bula khawsa mi pakhat a thih thu hriat a ni.


Mi thi, Pu Lian Za Thang, hian a mahin bomb chu inah a sawngbawl niin chinchang hriat tuma va kal ten an sawi a, bomb puak chuan in chhung atangin a vawrh chhuak a, a pum vel a hliam nasa hle a, a in pawh a chhe darh hle a ni an ti bawk.


Pu Lian Za Thang hian fa pahnih a nei a, a pa chu pastor niin an sawi bawk a ni. - Chinlandguardian.com


+++++


Zirlaite hmelma: Computer Games


Mizo doctor zirlaite, a bik takin mipate, chuan an zirna tibuaitu ber chu ‘computer games’ a ni tih interview-ah an sawi.


Interview-naah chuan “Games kan khelh chuan class kan la hman tawh lova, atawpah exam chhang thei lo (debar) zingah kan tel a, exam kan chhang thei lova kum khat kan fail phah thin a ni...kan mitin a chhiatphah a, kan rilru ngaihtuahna zawng zawng a tibui..” tiin an sawi.


He interview hi University of Medicine, Mandalay-a Mizo zirlai pa 7 leh Sanga leh Muantei inkawmna a ni a, zirlaite chuan mahnia in-control theih a tul zia an sawi uar hle a ni. - zoin.info


+++++


Singapore President Thar


September 1 (Nilaithawntan) khan President atan Singapore mipuite thlan tlin Dr Tony Tan Keng Yam chuan a hna a chelh tan a, a ni he ram President pasarihna a ni.


Dr Tony Tan (kum 71) hi Deputy Prime Minister hna hial lo chelh tawh thin a ni a, OCBC bank Chairman & CEO, sorkar pawisa hmanga sumdawnna lam khawihtu GIC-ah deputy Chairman, Singapore Press Holding Chairman hnate pawh a lo chelh tawh thin a ni.


NUS, MIT (US), University of Adelaide (Auz) atanga zir chhuak niin, NUS Vice Chancellor hmasa ber a ni bawk.


Amah hi Anglican kohhran mi niin fapa pathum 3 leh fanu pakhat a nei a ni.


Singapore President te hian thuneihna tak tak an nei tlem hle a, mahse ram aiawhtu a nih avangin an thlang fimkhur hle a ni. – Agencies


+++++


Tiau kawng leimin rapthlak


Kawng min avangin August 6, 2011 atang khan Tiau (India border) lama atanga rawn haw thla turte chuan buaina an tawk tan nia hriat a ni.


A min dan hi rapthlak hle a, kum tamtak kal ta atanga a min nasat ber kum a nih hial rin a ni. Tidim leh Sozang inkar a chhe nasa ber a, hmun tam takah a chim thlak avangin ke pawhin harsa taka kal a ngai hial a ni.


August 12 khan kawng phuahchawpin motor 20 vel chu Tahan lam panin an lo thleng thei hram. Motor lian kal thei tur chuan thla tam fe nghah a la ngai dawn niin a lang. Tahan-Tiau kawng hi Tahan atanga Mizoram kal tlang theihna kawng awmchhun a ni. - Tahan Times


+++++


Keimahni


MCFS General Meeting

August 30 (Thawhlehni) khan OB leh Committee member-ten General meeting vawi 3-na an nei a, an rorel tlangpui hruaitute hnen atanga kan dawn te chu:-



1. Outing vawi 3-na

A hun: 2 October (Sunday hmasa ber)

A hmun: Woodlands Waterfront



2. Computer lei


Inkhawmnaa hman tur Computer lei tura thu pass a ni a, September 2nd Sunday-a hman tan theih beisei a ni. S$600 aia to lo, lo lei turin a hnuaia mi pali-te hi mawhphurhna pek an ni.


(i) Pu Joshua

(ii) Nl Lalchhandami

(iii) Tv Thangpia

(iv) Nl Rosangzuali


Computer chu Biak Ina dah thin tur a ni a, Fellowship pawimawha hman atan chauh lakchhuah phal a ni ang. Secretary leh Asst Secretary te chu In-Charge atan ruat an ni.



3. 2012 Hruaitu Thlan


December 1st Sunday-a neih tur a ni.


Inthlan Chairman

Pu Laldinpuia (Valbuanga)


Puitute

Tv Biakhmingthanga (ziaktu)

Nl Lalchhandami (projector control-tu)



4. Music sub-Committee


He sub-Committee atan a hnuaia mi pariatte hi thlan an ni. MCFS hlabu chhunga hlate sak nuam tawk tur key lo zawng tura mawhphurna pek nghal an ni a, hla hruaitute hman tur master copy an buatsaih nghal bawk ang.


(i) Tv Lalhriattira (Leader)

(ii) Tv Lalrawngbawla

(iii) Tv Gospel Hrilzauva

(iv) Tv Zothlamuana

(v) Nl Rebecca Lalnunpuii

(vi) Nl Laldinsangi

(vii) MCFS Chairman (ex-officio)

(viii) MCFS Secretary (ex-officio)



5. MCFS Dan


Dan lo ennawn turin a hnuai mi 7 te hi mawhphurhna pek an ni a, October thla General meeting huna bihchian theih tura lo draf tura tih an ni. Dan chu Zawhfel hnuah a bua siam tur ani.


(i) Tv Zoramchhana (Leader)

(ii) Pu Laldinpuia (Vanbuanga)

(iii) Nl Lalchhandami

(iv) Tv Biakhmingthanga

(v) Tv Lalhriattira

(vi) MCFS Chairman (ex-officio)

(vii) MCFS Secretary (ex-officio)



6. Thulaipuibu


Kum 2012-a zir tur Thulaipuibu lo ngaihven turin: Pu Laldinpuia, Nl Lalchhandami, Tv Biakhmingthanga, Tv Lalhriattira, Tv Jimmy Lalruattluanga-te ruat an ni.


+++++


Editorial


BIAK IN CHUNGCHANG


AD 2009 a in her chhuah khan MCFS pawh hma kan sawnnin member pawh kan thahnem ta hle a, Dover Biak Inah kan len tak mang loh avangin committee chuan Biak In thar zawn a rawt ta a.


Kan Pastor fel tak takte leh kan hruaitu fel tak takten Biak In thar zawngin hma an la tan a. Inkhawmah pawh tawngtai thupui berah neihin Pathian hnenah kan thlen thin a nih kha. Kum tawp dawn ruaiah Pathian in kan dilnate chhangin tuna kan Biak In luah mek hi min pe a. Ni 6, Sep 2009 ah kan luah lut ta a ni. Tun kar hi kan luah luh kum hnihna chiah a ni a. Pathian hnenah lawm thu i sawi mawlh mawlh ang u. Kan Biak In neitu kohhran hi an felin an tha em em a, kan thil mamawh music instrument leh bungrua dahna tur thlengin min ngaihtuah sak a. Kan phu loh malsawmna MCFS hian kan dawng tak meuh a ni.


Kan Biak In neitute hian thil pakhat erawh min phut a, Biak In leh a chhehvel tih thianghlim hi a ni. Tin, Biak In compound chhungah Zuk leh hmuam hman khap a ni bawk. He thianghlimna thupek hi zawm ila, chuti lo chuan miin “Mizo ho hi an hmel that hlawm tehlul nen, an va thing e’ min tih palh ang e.


Pathian fak nana ring deuhva zai leh tawngtai chu an phal hle thung a ni. Kum rei tak he Biak Inah a mah kan fak ho theih nan Pathian hnena kan dil mawlh mawlh a ngai a ni.


+++++


2011 September thla chhunga chanvo neitu turte



1st Sunday [4 Sep 2011]

Sacrament/Sermon

Chairperson : Pu FVL Hruaia

Hunneitu : Rev Ngengchhuana



2nd Sunday [11 Sep 2011]

Thulaipuibu Zir 14

Chairperson : Pi Hana Lalchhandami

Hunneitu : Nl Lalrinpari

3rd Sunday [18 Sep 2011]

Sermon/Thupui

Chairperson : Tv Lalzothanga

Hunneitu : Tv Zoramchhana



4th Sunday [25 Sep 2011]

Thulaipuibu zir 15

Chairperson : Tv Lalhlunmawia

Hunneitu : Nl Rodingliani


+++++


Article


NUN HLUI MANGTHA


By F. Zothlamuana


Tlai khat chu thiante nena awm e ti lo chuan ka rilru ka lo kawm veng veng mai a, ka thawlak a zawi fan raih mai a, muang changin van lam chu ka han thlir chho va. Chhawrhthla eng pawphet mai chu ka thlir reng a. A lan dan atang chuan lei lam eng tam lutukin a mawina a paih sak vek ni hian ka hria. Minute reilo te hnuah chuan thawpui chhuah pah chuan “Awi! kan khuaah chuan e, I enna daltu a piang chu ka diriam thin a sin” tiin zawite hian ka han phunsap a. “I mawina eng lawmin perhkhuang tingtang te nen zan khawtlai tur reng dawn lovin I zar kan lo zo thin lai te kha aw!”


Tunah zawng, khang hunlaia kan hlimna te khan mual min liam san zo ta. Ngaiin au mah ila kir zai an rel tawh si lo. ‘Valtha tin a hun ta’ tia zanlai boar zairi te kha min hriat chhuah tir ta hial mai.


“Suihlung lenin tlangtin ka han chuan a, Zanpar rimtui suihlung kuai tu reng’an a leng vel e, zanpar rimtui lenin” ti a, C. Van’an thiam taka a sak fawn delh delh te kha ka thinlaiah a lo thar leh uar uar mai!

Thlasik laia daithlifim vawt raih mai leh boruak thiang tak karah chuan Hmangaihna pawh a par mawi zual thin nameuh mai, Tunah zawng khang kan hlimna thin, tlang leh mual zawng zawng te khan kan hriat reng na turin sulhnu tak ngial pawh min hnut chhiah ta lo.


Avang chu Hmasawna-in thlaler ram ang hialin a ti tiau zo ta. Khawvel hmasawnna chak taka fawn vel chuan mitin te hi a hrut a, chu mi karah chuan keini ho pawh min chim pil ve mek zawng a nih hi!


Tun hma ka hlimpuithin te khan min ti tlei zo tawh ta lo. Duh tawk tih a awm thei lo bawka mahni nunna hial pawh thap ngam turin hmasawnna chuan huai senna min neih tir a, beiseina sang tak nen, hlawhtlin tum tlatin, then leh rual, khua leh tui, ram thlengin min then hran tir ta hial zawng a nih hi.


Mi tam takin Tuipui ral ram min kai san a, kir zai reng an rel tawh lo. Thenrual lungduh te intawn leh ni awm leh tak ang maw?


A then fam ro lung muala’n min ngai lo ten an liam si; kan chhung te leh ka khua leh tui ten malsawmna an dawn theihna tur chuan hmangaih tun a tuar a ngai tlat bawk si a ni. Ngai chungin chhungte leh thian thatte kan thlah liam a, Inhnemnan: “Chung Pathian zarah kan la in hmu khawm leh ang” tiin kan inthlir liam vawng vawng thin.


Kan Zo khawpui ngeiah lam ang let leh mah ila lenrual kim ni tih a awm thei tawh lo. Hmanah chuan lenrual duh ten nen tlai khua pawh kan var thin a, tunah erawh riakmaw va iangin chhawn tu nei lo rengin;


Aw khawnge maw in awm tak le!

Zai vawra suihlung rualpui;

Nang zawng Nun hlui mual liam ta la,

Dam takin Aw! Mangtha le!


++++++++++


Computer thar kan nei

MCFS chuan Netbook computer kan nei ta, ASUS X23FT, Intel Core i3 - 380um a ni a, kum khat warranty awm chi a ni. S$599 man a ni.

++++++++++